नेपाल नागरिक उड्डयन प्राधिकरणले अन्तर्राष्ट्रिय प्रचलनअनुसार हवाई टिकटमा नै यात्रु सेवा शुल्क थप गरी लिने निर्णयगरेको छ।

पर्यटन तथा नागरिक उड्डयनमन्त्री हिसिला यमीको अध्यक्षतामा आइतबार बसेको प्राधिकरण सञ्चालक समितिको बैठकले सो निर्णय गरेको हो। यो निर्णयआइतबारदेखि नै लागू भएको छ। यसअघि सो सेवा शुल्क नबिल बैंकमार्फ कुपनको माध्यमबाट उठाउँदै आएको थियो।

प्राधिकरणका महानिर्देशक केशवराज खनालका अनुसार नेपालमा सेवा सञ्चालन गरिरहेका अन्तर्राष्ट्रिय वायुसेवा, वायुसेवाका संगठन बोर्ड अफ एयरलाइन्स नेपाल र अन्तर्राष्ट्रिय हवाई यातायात संघसँग लामो पत्राचार तथा छलफलपश्चात् सो व्यवस्था लागू गरिएको हो।

प्राधिकरणले यसका लागि नेपालमा सेवा सञ्चालन गरिरहेका अन्तर्राष्ट्रिय वायु सेवाहरुसँग ७ दिनभित्र द्विपक्षीय सम्झौता गर्ने व्यवस्था पनि मिलाइसकेको छ। यो प्रावधान आइतबारभन्दा पहिले नै बिक्री भइसकेको टिकटको हकमा लागू नहुने प्राधिकरणले जनाएको छ।