रोजगारदाता अनुमति प्रणाली (इपीएस) कोटा प्रणाली अन्तर्गत भाषा परीक्षामा छनौट भएका नेपाली कामदार कोरिया जान नपाउने हल्ला चलिरहेको बेला कोरियाका लागि नेपाली राजदूत कमल कोइरालाले कोरियन सरकारका तर्फबाट त्यस्तो कुनै प्रतिक्रिया नआएको बताउनुभएको छ। उहाँले अझ आगामी वर्षका लागि भाषा परीक्षाको तयारी लिने प्रतिक्रिया कोरियन सरकारका तर्फबाट आएको बताउनुभयो। 

कोटा प्रणाली अन्तर्गत करिब बाइस सय जना नेपाली गएपछि अहिले कोरिया जाने नेपाली संख्या सातहजार नाघेको छ। विश्व आर्थिक मन्दीले कोरियामा नेपालीहरुको रोजगारीमा कुनै खतरा नआएको राजदूत कोइरालाले दाबी गर्नुभयो। 

भाषा परीक्षा उत्तीर्ण गरेका करिब चार हजार चार सयको संख्यामा नेपालीहरु कोरिया जाने प्रतिक्षा सूचीमा रहेका छन्।।